भारतका फुटबल स्टाईकर ३४ वर्षीय सुनिल क्षत्रीले अर्जेन्टिनी स्टार लियोनल मेस्सीको रेकर्डसमेत तोड्न सफल

भारतका फुटबल स्टाईकर ३४ वर्षीय सुनिल क्षत्रीले अर्जेन्टिनी स्टार लियोनल मेस्सीको रेकर्डसमेत तोड्न सफल

इ-परेवा

@Eparewa

२०७५ पुस २३ गते सोमबार ०१:२२

भारतीय फुटबलमा ‘गोल मेसिन’ का नामले परिचित सुनिल क्षेत्रीको दुई गोलको सहयोगमा भारतले थाइल्याण्डलाई ४–१ ले हराउँदै एसिया कपमा विजयी सुरुवात गरेको छ ।आफ्नो दोस्रो एसिया कप तथा समग्रमा १०५ औँ खेल खेलेका क्षत्रीले पहिलो गोल २७औँ...

भारतीय फुटबलमा ‘गोल मेसिन’ का नामले परिचित सुनिल क्षेत्रीको दुई गोलको सहयोगमा भारतले थाइल्याण्डलाई ४–१ ले हराउँदै एसिया कपमा विजयी सुरुवात गरेको छ ।
आफ्नो दोस्रो एसिया कप तथा समग्रमा १०५ औँ खेल खेलेका क्षत्रीले पहिलो गोल २७औँ मिनेटमा पेनाल्टीमार्फत गरेका हुन् । त्यस्तै खेलको ४६औँ मिनेटमा भारतीय कप्तान सुनिल क्षत्रीले दोस्रो गोल गरे । यी गोल उनका क्रमशः ६६औँ र ६७औँ अन्तर्राष्ट्रिय गोल थिए । भारतले सन् १९६४ पछि पहिलो पटक एसिया कप फुटबलमा जित हात पारेको हो ।

मिडफिल्डर अनिरुद्ध थापाको ठाउँमा सब्स्टिच्यूट खेलाडीका रुपमा मैदान प्रवेश गरेका जेजे लालपेखलुआले ६८औँ र ८०औँ मिनेटमा भारतका लागि तेस्रो र चौथो गोल गरे । यूएईको अबुधाबीमा रहेको अल नाहयान रंगशालामा भएको खेलमा भारतसामू थाइल्याण्ड निरीह बन्यो । थाइल्याण्डका लागि कप्तान टीरासिल डांग्डाले ३३औँ मिनेटमा एक गोल गरेका थिए ।
भारतीय टिमको हौसला बढाउन रंगशालमा ठूलो संख्यामा भारतीय प्रशंसक उपस्थित थिए । आइतबार राति भएको खेलमा दुई गोल गरेका ३४ वर्षीय सुनिल क्षत्रीले अर्जेन्टिनी स्टार लियोनल मेस्सीको रेकर्डसमेत तोड्न सफल भएका छन् । मेस्सीले १२८ अन्तर्राष्ट्रिय खेलमा ६५ गोल गरेका छन् । पोर्चुगलका स्टार फुटबलर क्रिस्टियानो रोनाल्डो भने १५४ खेलमा ८५ गोल गर्दै राष्ट्रिय टिमबाट सबैभन्दा बढी गोल गर्ने खेलाडीको सूचीको पहिलो नम्बरमा छन् ।

भारतीय टोलीमा सुनिल क्षत्री मात्रै पछिल्लो संस्करणको एसिया कपमा खेलेका खेलाडी हुन् । एसिया कपमा भारतको सहभागिता यो चौथो पटक हो । सन् १९६४ मा इजरायलमा भएको एसिया कपमा भारतले दुईवटा खेल जितेको थियो भने एउटामा हार व्यहोरेको थियो ।
सन् १९६४ को एसिया कप फुटबलमा इजरायल विजेता बनेको थियो भने भारत उपविजेता । त्यसपछि १९८४ मा भएको एसिया कपमा भारतले समूह चरणका तीनवटै खेलमा पराजय भोग्यो । सन् २०११ को एसिया कपमा पनि १९८४ कै नतिजा दोहोरियो । तर २०१९ को एसिया कप फुटबलमा भने भारतले राम्रो सुरुवात गरेको छ ।
भारतले अब समूूह चरणमा बहराइन र यूएईसँग खेल्नेछ । बहराइन र यूएईले बराबरी खेलेकाले अर्को चरणमा पुग्न भारतलाई एउटा टिमसँगको बराबरी मात्रै पनि काफी हुनेछ ।

प्रकाशित मिति २०७५ पुस २३ गते सोमबार ०१:२२
प्रतिक्रिया दिनुहोस