धनुषाधाम– ‘म महिनावारी हुँदा विद्यालय छुटाउदिनँ, महिनावारी भन्न र प्याड प्रयोग गर्न लाज मान्दिनँ’ नायिका प्रियंका कार्कीले आधारभूत निम्न माध्यमिक विद्यालयकी छात्रा नजराना खातुनलाई उच्चारण गर्न लगाइन। धनुषाको भुग्राहास्थित विद्यालयमा आयोजित समारोहमा प्रियंकाले महिनावारी र प्याड प्रयोगबारे जानकारी गराउँदै छात्रालाई सपथकै शैलीमा प्रतिबद्धता गर्न लगाइन।

प्रियंका प्याड, झोला, डस्टबिन बोकेर सोमवार धनुषा आएकी थिइन्। उनको साथमा थिए नायक आयुष्मान देशराज जोशी र गायक सरोज ओली। उनको स्वामित्वमा रहेको आयंका फाउन्डेसनले धनुषाधामबाट ‘न महिना वारी, न महिना पारी म, म हुँ महिना भरी’ नाराका साथ महिनावारी स्वच्छता अभियान सुरु गरेको छ। आधारभूत निमावि सहित धनुषाका हरिपुर निगाहपुर मावि र आधारभूत माध्यमिक विद्यालयमा २/२ वटा शौचालयसमेत निर्माण गरिदिएको छ। फाउन्डेसनले तीन वटै विद्यालयमा दुइटा शौचालय, फल दिने ९ वटा बिरुवा, २ थान डस्टबिन, एक सय थान ब्याग र ५० थान पुनः प्रयोग गर्न मिल्ने प्याड वितरण गरेको छ। महिनावारी स्वच्छता अभियान देशैभर सञ्चालन हुने आयंका फाउण्डेसनकी अध्यक्ष प्रियंकाले बताइन। अध्यक्ष प्रियंकासहित फाउण्डेसनका कोषाध्यक्ष आयुष्मान र सल्लाहकार सरोजले छात्रालाई महिनावारीसम्बन्धी सचेतना अभिवृद्धि गरेका थिए। 

नायिका कार्कीले महिनावारीको विषयमा अहिलेसम्म खुलेर कुरा गर्ने संस्कारको विकास नभएको भन्दै छात्रालाई महिनावारी भएको समयमा सरसफाइमा ध्यान दिन आग्रह गरिन्। कपडाबाट बनेको सो प्याडलाई धोएर एक वर्षसम्म प्रयोग गर्न मिल्ने उनले जानकारी गराइन्। एउटा झोलामा चार थान प्याड, दुई थान अन्डरवेयर, साबुनलगायत सामग्री रहेको बताउँदै प्रियंकाले प्याड प्रयोग गर्ने तरिकासमेत छात्रालाई सिकाइन्। ‘महिनावारी सबै महिलालाई हुन्छ। यो लाज मान्ने कुरा होइन। हामीले सोच परिवर्तन गर्नुपर्छ’, उनले भनिन्। 

पूरा पढ्नुहोस