कैलालीको टिकापुर हत्याकाण्डका मुख्य अभियुक्त रेशम चौधरीसहित ११ जनालाई जन्मकैदको फैसला भएको छ । आज जिल्ला अदालत कैलालीका न्यायाधीश परशुराम भट्टराईको एकल इजलासले यस्तो फैसला सुनाएको हो । 

७ भदौ २०७२ मा टिकापुरमा भएको थारुवान र अखण्ड सुदुरपश्चिमको आन्दोलनका क्रममा एक नाबालक र ८ सुरक्षाकर्मीको ज्यान गएको थियो । मुद्दाका ५८ प्रतिवादीमध्ये २७ जना थुनामा छन् । बाँकी ३१ जना फरार छन् । फरार रहेकै अवस्थामा गत आम निर्वाचनमा कैलाली १ बाट चुनाव जितेका रेशम चौधरीलाई १९ पुसमा सांसदको सपथ गराइएको थियाे ।  चौधरी अहिले पनि डिल्लीबजारस्थित कारागारमै छन् । 

 

चाैधरीसँगै हरिनारायण चौधरी, राजकुमार कठरिया, सुन्दरलाल कठरिया, बृज मोहन डगौरा, राजेश चौधरी, विरबहादुर चौधरी, प्रदीप चौधरी, विद्रोह भनिने सिताराम चौधरी, श्रवण चौधरी, गंगाराम चौधरीलाई पनि जन्मकैद फैसला भएकाे छ । उनीहरुमध्ये श्रवण चौधरी नावालक रहेकाले उनलाई १० वर्ष कैद सजाय हुने छ ।  

अदालतले अन्य १२ जना प्रतिवादीलाई तीन वर्ष र एकजना छ महिना कैद सुनाएकाे छ । छ महिना कैद फैसला हुनेहरुमा लक्षण थारु, लाहुराम चौधरी, रामकुमार कठरिया, सन्तराम चौधरी, जीतबहादुर डगौरा, प्रेमबहादुर चौधरी, किशानलाल चौधरी, दिलबहादुर चौधरी, सन्तोष थारु चौधरी, विश्राम चौधरी, चुन्नीराम चौधरी र रामप्रसाद चौधरी छन् । 

उनीहरुमध्ये चुन्नीराम बाहेकले कैद भुक्तानी गरीसकेकाेले आजै थुनामुक्त हुने छन भने चुन्नीरामकाे ३० फागुनमा छ महिना कैद पुग्नेछ ।

 

जिल्ला अदालत कैलालीको फैसला मान्य नहुने राजपाको चेतावनी

रेशमलाल चौधरीलाई जन्मकैदको सजाय तोक्ने जिल्ला अदालत कैलालीको फैसला मान्य नहुने चेतावनी दिएको छ । राजपा नेपालका नेता राजेन्द्र महतोले जनताको प्रतिनिधिलाई जन्मकैदको सजाय दिने फैसला दिने जिल्ला अदालत, कैलालीको फैसला मान्य नहुने चेतावनी दिनु भएको हो ।

पार्टीका सांसद चौधरीलाई जन्मकैदको सजाय दिने अदालतको फैसला ‘अन्यायमाथिको पनि अन्याय’ भएको टिप्पणी गर्दै उहाँले त्यसविरुद्ध देशमा राष्ट्रिय विद्रोह सुरु गर्ने घोषणा पनि गर्नुभयो । ‘जनताको प्रतिनिधिमाथि यसरी जन्मकैदको फैसला गर्न मिल्छ ? यो सरासर अन्याय, अत्याचार  र अन्यायमाथिको पनि अन्याय भएकाले थारु, जनजाति, मधेशी मिलेर देशमा राष्ट्रिय विद्रोह सुरु हुने’ नेता महतोको दाबी छ ।

 

नेता महतोले पार्टीका सांसद चौधरी आन्दोलनकारी भएको र उनीमाथि जन्मकैदको फैसला गर्नै अदालतले पुष्पकमल दाहाल, केपी ओली, गिरिजाप्रसाद कोइरालालाई किन जन्मकैदको सजाय नदिएको ? भनि आक्रोश पनि व्यक्त गर्नु भयो ।

 

टिकापुर हत्याकाण्डमा के भएको थियो?

थरूहटको आन्दोलन चर्किँदा विसं २०७२ भदौमा भएको विरोधप्रदर्शन हिंसात्मक बनेपछि भिडले आक्रमण गरेर नेपाल प्रहरीका वरिष्ठ प्रहरी उपरीक्षक लक्ष्मण न्यौपानेसहित आठ सुरक्षाकर्मीलाई मारिदिएको थियो। सो घटनामा एक बालकको पनि ज्यान गएको थियो।

कैलालीमा नेपाल प्रहरीका वरिष्ठ उपरीक्षकको मृत्यु भएपछि नेपाल प्रहरी स्तब्ध भएको थियो । उनी घटना भएको केही दिनअघि मात्रै सेती अञ्चल प्रमुखको जिम्मेवारी सम्हाल्न कैलाली आइपुगेका थिए, एसएसपी लक्ष्मण न्यौपाने । प्रहरीभित्र निकै मिजासिलो मानिएका न्यौपाने नेकपा एमालेका नेता मुकुन्द न्यौपानेका काकाका छोरा हुन् ।

 

थरुहट संघर्ष समितिले सरकारी कार्यालयमा थरुहट स्वायक्त प्रदेश लेख्ने योजना बनाएको थियो । सोही अनुसार थारु समुदायका झण्डै ८ हजारभन्दा बढीको संख्यामा आन्दोलनकारी टीकापुरतर्फ अघि बढ्दा प्रहरीले रोक्यो । सुरक्षाकर्मीलाई धकेल्दै अघि बढेका आन्दोलनकारी पशु हाटमा पुगेपछि केहीबेर झड्प भयो । प्रहरीले अश्रुग्यास हानेपछि आन्दोलनकारी झनै उत्तेजित बनेका थिए ।

 

फिल्डमै खटिएका एसएसपी न्यौपाने आन्दोलनकारीलाई सम्झाउन अघि बढे । तर, आन्दोलनकारीहरुले कब्जामा लिँदै उनीमाथि एक्कासी भाला र गोली प्रहार भयो । त्यसपछि घाइते बनेका उनलाई आन्दोलनकारीले शरीरमा पेट्रोल खन्याएर आगो लगाएको कैलाली प्रहरीले बताएको थियो । प्रदर्शनकारीले सँगै रहेका एसएसपी न्यौपानेका अंगरक्षक माथि भाला प्रहार गरी हत्या गरेका थिए ।