विवाह मण्डपमै बेहुली छाडेर भाग्ने बेहुला पक्राउ परेका छन् । मण्डपमा बेहुली छाडेर भाग्ने मोरङ जहदा गाउँपालिका–४ का वर्ष २४ को लक्ष्मण राजवंशीलाई प्रहरीले पक्राउ गरेको हो । उनले मागे बमोजिमको दाइजो नदिएको भन्दै विवाह गर्न अस्वीकार गरेका थिए । परम्परागत रुपमा यही जेठ ४ गते जहदाकै २१ वर्षीय युवतीसँग विवाह भइरहेको अवस्थामा राजवंशीले माग बमोजिमको दाइजो नदिएको भन्दै विवाह मण्डपबाटै उठेर हिँडेका थिए ।

 

 

दुवै पक्षको परिवारबीच कुराकानी मिली राजीखुसीका साथ गत जेठ ३ गते विवाह गर्ने तय भएअनुसार सम्पूर्ण तयारी पूरा भएको थियो । राजवंशीले बेहुली पक्षलाई मोटरसाइकल, सुनको सिक्री र डायनिङ टेबल दिनुपर्ने भन्दै बेहुली पक्ष दबाब दिएका थिए । यता बेहुली पक्षले दिन नसक्ने भनेपछि राजवंशी विवाहको मण्डप नै छाडेर भागेको जिल्ला प्रहरी कार्यालय मोरङका प्रवक्ता डिएसपी घनश्याम श्रेष्ठले जानकारी दिए ।

‘राजवंशीलाई मुलुकी अपराध ऐन २०७४ अन्तर्गतको विवाह सम्बन्धी कसुर बमोजिम जिल्ला अदालत मोरङबाट म्याद थप गरी थप अनुसन्धान भईरहेको छ,’ उनले भने । राजवंशीलाई प्रहरीले चार दिनपछि पक्राउ गरेर अदालतमा पेश गरेको हो । राजवंशीलाई प्रहरीले पक्राउ गरी मुद्दा चलाउन आदलतबाट म्याद थप गरी अुसन्धान भइरहेको जनाएको छ ।

 

* मागे जति दाइजो नपाएपछी हत्या

बाँकेमा मागे जति दाइजो नदिएको निहुँमा जानकी गाउँपालिका–३, इन्द्रपुरकी २१ वर्षीया नीरा कुर्मीको हत्या भएको बताइएको छ। गत वर्षको वैशाखमा डुडुवा गाउँपालिका–३, वनकट्टीका २२ वर्षीय राममनोहर कुर्मीसँग विवाह भएको नीराको माइती पक्षले हत्या भएको दाबी गरेको छ।

नेपालगञ्जमा आज माइती पक्षले पत्रकार सम्मेलन गरी विवाहपछि राममनोहरले दाइजो नदिएको भन्दै पटकपटक कुटपिट गर्ने गरेको र दाइजो नपाएकै कारण हत्या भएको दाबी गरेको छ। नीराका बुबा राधेश्याम कुर्मीका अनुसार दाइजो नल्याएको भन्दै राममनोहर र उनका परिवारले पटकपटक कुटपिट गर्दै आएको नीराले माइतीमा बताउँदै आएकी थिइन्।

मरणासन्न हुने गरी कुटपिट भएपछि गत माघ १ गते भेरी अस्पतालमा भर्नासमेत भएकी थिइन्। विवाहमा रु सात लाख खर्च गरेका माइती पक्षले छोरीमाथिको अन्याय सहन नसकेर गएको वैशाखमा पुनः १ लाख बराबरको सोफा, दराजलगायतका सामग्री राममनोहरलाई दिएको नीराका बुबा राधेश्यामले बताए।

त्यसपछि पनि मोटरसाइकल नदिएको भन्दै राममनोहरले पटकपटक कुटपिट गरेका थिए। बारम्बार कुटपिट हुन थालेपछि न्याय माग्दै माइती पक्षले जिल्ला प्रहरी कार्यालय बाँकेको महिला सेलमा उजुरी दिएपछि आगामी दिनमा गल्ती नदोहो¥याउने भन्दै माफी मागेर नीरालाई घर लगेका थिए। तर यही जेठ २ गते दिउँसो नीरा झुण्डिएको अवस्थामा फेला परेपछि माइती पक्षले आत्महत्या नभई हत्या भएको दाबी गरेको छ।

‘आत्महत्या होइन, घर परिवारले मिलेर हत्या गरेको हो’, नीराका बुबा राधेश्यामले भने, ‘मेरो छोरीको हत्या गर्ने परिवारलाई कडा कारवाही हुनुपर्छ।’ आत्महत्या हो वा होइन भन्ने विषयमा प्रहरीले अनुसन्धानका लागि नीराका श्रीमान् राममनोहरलाई पक्राउ गरी थप अनुसन्धान भइरहेको बाँकेका प्रहरी प्रमुख प्रहरी उपरीक्षक अरुण पौडेलले बताए। रासस